Փորձառություն - Ծովային ափսե

Կերամիկայի վարպետաց դաս․ ծովային ափսե Ափսեն կարող է լինել ավելին, քան շրջան․ այն կարող է լինել գիծ, շարժում, ժեստ, լինել խոր, նախշով կամ ուղերձով։ Այս վարպետաց դասին կստեղծեք ազատ ձևի ափսե՝ այնպիսին, որը չի ենթարկվում կանոններին, այլ հետևում է ձեր զգացողությանը։ Ասիմետրիա, մեղմ կորություններ, անհարթ եզր կամ հակառակը՝ հանգիստ և մաքուր երկրաչափություն․ դուք եք որոշում առարկայի ռիթմն ու բնավորությունը։ Սա փորձարկման տարածք է, որտեղ ձևը ծնվում է ձեռքից, ոչ թե շաբլոնից։ Ընթացքում կծանոթանաք ձեռքով կերտման տեխնիկային, կստեղծեք ձեր ձևի և չափի ափսեն, կավելացնեք ֆակտուրա, ռելիեֆ կամ գրություններ և կընտրեք ջնարակ, որը կընդգծի աշխատանքի պլաստիկան։ Դասը հարմար է նաև սկսնակների համար․ այստեղ կարևոր է ոչ թե ճշգրտությունը, այլ նյութի զգացողությունն ու ազատությունը։ Վարպետաց դասից հետո աշխատանքը կմնա չորացման և թրծման համար, իսկ որոշ ժամանակ անց կստանաք պատրաստ կերամիկա՝ առարկա, որի մեջ պահպանված կլինի ձեր ժեստը։ Վարպետաց դասի թեման գաղափար և ներշնչանքի ուղղություն է։ Կարող եք ստեղծել նաև ցանկացած այլ աշխատանք, որը ձեզ ավելի մոտ է։ Բոլոր նյութերն ու թրծումները ներառված են։